Nagapati ang pinuno sang 303rd Infantry Brigade nga mga remnants nalang sang nadismantle na nga grupo sang New People’s Army ang nag-ambush sa mga miyembro sang Calatrava Municipal Police Station sa Sitio Kalanugan, Barangay Minapasuk, Calatrava, Negros Occidental sang Miyerkules sang aga.
Sa interview sang Bombo Radyo kay Brigadier General Orlando Edralin, ginkondenar sini ang ginhimo sang NPA sa banwa sang Calatrava.
Nagpalab-ot man ini sang pagpakig-unong sa pamilya ni Police Corporal Jayme Nunez nga napatay on the spot.
Santo sa assessment sang 79th Infantry Battalion, remnants ukon bilin nalang sang North Negros Front ang nag-ambush sa mga pulis.
Suno kay Edralin, diutay nalang ang remnants apang indi man ma-saturate sang mga suldado ang 40 ka mga barangay sa Calatrava.
Ang North Negros Front suno kay Edralin ang nadismantle sang bulan sang Abril tuig 2021 apang wala ini nagakahulugan nga wala na gid sang bilin sa ila nga grupo.
Bangud diutay nalang ang nabilin suno sa iya, nagahalong man ang mga ini kag nagahulat sang kahigayunan nga sila ang makalusot kag nagmadinalag-on ang mga ini sang nagsaka ang Calatrava Municipal Police Station sa Barangay Minapasuk.
Ginkumbinsi naman sang militar ang mga himata sang remnants nga magsungka na.
Ginakabig ni Edralin nga isolated case ang natabo sa Sitio Kalanugan, Barangay Minapasuk bangud indi man nila masakop ang bilog nga banwa.
Suno sa Army official, propaganda ini sang rebelde nga grupo agud nga mapakita nga mabakod pa ang ila pwersa.
Bangud malapit na ang Barangay kag Sangguniang Kabataan elections suno sa iya, luyag man sang rebelde nga grupo nga masapakan ukon nagaplano ang mga ini nga magdemand sang permit to campaign.
