Nakahanda si Bacolod City Mayor Alfredo Benitez nga mag-entertain sang lain nga concessionaires nga magasupply sang tubig sa ciudad sa tion nga indi gid magy-improve ang serbisyo sang Bacolod City Water District kag Prime Water.
Nahibaluan nga dako pa nga bahin sang ciudad ang nagaeksperyensya sang water supply shortage ukon pili lang ang inoras nga nagatubod ang gripo.
Suno kay Benitez, madamo gihapon sang kulang bisan duha na ka tuig ang operation sang Prime Water sa Bacolod.
Nagaplano si Benitez nga mag-istorya liwat sa Prime Water bangud nagapati ini nga kinahanglan mag-invest sa bag-o nga piping system bangud kun indi mag-invest sa water pipes, magapabilin ang problema sa sediments nga nagatapik sa mga tubo.
Kun indi maislan suno sa alkalde, indi gid magtinlo ang tubig bangud ara na ang sediments.
Kahapon, nakigsapol si Benitez sa officers sang pila ka mga home owners associations kag ila ginpahayag nga problema gid ang mahigko nga tubig nga nagagwa sa gripo kun sa diin pila ka minutos ang pagpatubod sini antes magtin-aw.
Suno sa alkalde, kun indi mapasalig sang Prime Water ang bag-o nga piping system, maga-entertain ini sang lain nga concessionaire paagi sa public-private partnership.
Suno sa iya, mandated ang city government nga maghatag sang maayo nga serbisyo sa mga pumuluyo kaangay sang tubig.
Panindugan ni Benitez, indi obligado ang city government nga ipa-exclusive lang sa isa ka kompaniya ang water supply, nagikan sa bulk water supply padulong sa distribution.
