Ginadihon sa karun sang Negros Occidental Provincial Government ang pagtukod sang mga solar-powered nga mga suga sa Negros Occidental Provincial Capitol, partikular na sa play ground.
Suno kay Occidental Provincial Administrator Atty Rayfrando Diaz, ila natalupangdan nga sa karun bisan pasado na alas-6:30 sang gab-i, madamo gihapon sang mga tawo sa capitol lagoon, kalakip na ang mga kabataan nga nagahampang sa play ground.
Bangod madulom na ang lugar, ginakahangaw-an sang mga ini nga may magluntad nga aksidente sa mga kabataan nga nagahampang.
Naghuman naman sila sang team nga amo ang magatukod sang poste nga hamtangan sang solar-powered nga suga kag maislan ang mga nagkalaguba ukon nadula na nga suga.
Pinaagi sa pagpasanag sa lugar, malikawan ang mga aksidente sa kabataan kag mapalawig pa oras nga maggamit ang play ground.
Sa pihak nga bahin ginaplano man sang Provincial Government nga palaparun ang area nga garden soil ukon hamtangan sang carabao grass.
Apang sa kadamuon sang mga nagalagaw sa lagoon, ginalantaw ni Diaz nga indi magdugay ang mga carabao grass gani ginaduso sini nga magplastar na lamang sang fake grass sa capitol lagoon.
Ang Provincial Capitol Lagoon ang nagapabilin nga bukas tubtob alas-10:00 sa gab-i.
