Ginalantaw nga mabuksan na ang dog park sa Negros Occidental Capitol Lagoon kadungan sa kaadlawan ni Negros Occidental Governor Eugenio Jose “Bong” Lacson sa Desyembre.
Suno kay Negros Occidental Provincial Administrator Atty Rayfrando Diaz, madamo sang mga nagakwestyon kun ngaa ginadumilian ang mga pets sa capitol lagoon.
Paathag sini nga ini para sa kahilwayan sang mga nagalagaw sa lagoon, agud mamintenar ang katinlo sa lugar kag malikawan nga may makadtan ilabi na nga indi man luyag sang mga animal advocate nga butangan sang busal ang mga bibig sang sapat.
Apang makabig nga win-win solution para sa mga pet lover kag mga indi luyag sang sapat kun may-ara sang area nga magaserbe lamang nga dog park sa lagoon.
Suno kay Diaz, plano nila nga iconvert bilang dog park ang skating rink, bangod ini ang wala naman ginagamit.
Ini ang igapreparar paman sang Provincial Government agud mabuksan sa Desyembre kadungan sa kaadlawan sang gobernador.
