Positibo ang organizer sang MassKara Festival nga indi na masulit ang natabo tinalikdan nga tuig kun sa diin may deficit sa budget kag nagtabon pa si Mayor Alfredo Benitez sang P6 million.
Sa interview sang Bombo Radyo kay Mate Espina, public relations officer sang Yuhum Foundation, nagapati ini nga indi tuman ka kontrobersiyal ang natabo bangud nakit-an man nga halos isa ka bulan ang MassKara Festival tinalikdan nga tuig.
Suno kay Espina, malawig ang MassKara Festival 2023 bangud ini ang una nga kahigayunan nga ginbalik ang festival matapos ang COVID pandemic.
Bangud sini, wala naforecast sang maayo ang tanan nga cost sang madamo nga aktibidades kag wala nag-igo ang tanan nga sponsorship kag income nga natipon sa cost sang activities.
May yara man sang isa ka sponsor nga nagcommit sang dako nga kantidad apang mas manubo nga amount ang final nga ginhatag nga nangin isa ka factor sa deficit.
Ang natabo suno kay Espina ang mga lessons nga ginarectify sa karon lakip na ang pag-istriktuhanay sa sponsorship details kag procurement sang supplies nga kinahanglanon.
Suno kay Espina, nagsaka man ang cost sang kinahanglanon nga logistics sang natapos na ang pandemic gani nagcontribute ini sa deficit sang pondo.
