Agusto kag Setyembre pa lang, ginapaabot nga fully-booked na ang mga hotel sa ciudad sang Bacolod bangud sa MassKara Festival.
Sa interview sang Bombo Radyo kay Mate Espina, public relations officer sang Yuhum Foundation nga amo ang organizer sang festival, nakabaton siya sang impormasyon nga may isa ka contingent nagikan sa Malaysia nga magaabot agud nga magsuporta sa sports activity sang MassKara Festival kaangay sang football kag may yara man sang nagikan sa South Korea.
Suno kay Espina, ginahulat sang mga turista ang official schedule of activities agud nga makabook sang ila nga flight.
Suno kay Espina, ginalauman ang pagdagsa sang mga bisita sugod Oktubre 18 tubtub sa highlight apang wala na sang available nga hotel rooms kun amo ni nga petsa pa lang mapabooking.
Kumbinsihon man sang city government ang mga tag-iya sang balay nga nagatanyag sang ila puluy-an bilang staycation agud nga malista sila sang City Tourism Office.
Nagalaom naman si Espina nga ipakita sang mga Bacolodnon ang matuod nga hospitality nga makaganyat sa mga turista nga magbalik-balik diri sa ciudad.
