Ginpadala na sa Bureau of Fire Protection (BFP) National Headquarters ang mga natipon nga ebidensya agud matumod ang matuod nga gintunaan sang pagkasunog sang Colegio de Sta Rita de San Carlos Inc. sang Lunes sang gab-i.
Nagapati ang BFP-San Carlos nga faulty electrical wirings ang rasun sa nagluntad nga sunog, gani ini man ang focus sang ila imbestigasyon.
Pagatsekyaron man sang mga ini ang electrical system sang buluthuan nga gintukod sadtong 1930s.
Sa pahayag ni Fire Chief Inspector Rofeno Tanedo, fire marshal sang San Carlos City Fire Station, napadala na nila ang mga natipon nga ebidensya sa Arson Laboratory sa BFP Headquarters partikular na ang mga electrical items sa buluthuan.
Suno diri, ginpahayag sang gwardiya sa buluthuan nga antes matabo ang sunog, brown-out sa lugar tubtob nga may nabatian ang mga ini nga pagsigabong, kag didto na nag-umpisa nga may nakita nga aso kag madasig nga naglapta ang kalayo.
Ginalantaw naman nga ang pagsigabong amo ang gin-umpisahan sang sunog.
Nahibaluan nga antes paman ang nagluntad nga sunog, ang Colegio de Sta Rita de San Carlos Inc. ang nagapatigayon man sang rennovation.
Sa karun, ginahulat pa ang findings sang San Carlos City Engineering Office sa building apang kun ang BFP San Carlos ang pahambalon, ginarekomendar nila nga idemolish na ang buluthuan bangod dilapidated na katama ang building.
Ang buluthuan ang may kapin 800 ka mga estudyante kag wala pa matumod kun igasaylo ang klase sa ila extension campus, apang sa karun temporaryo nga suspendido ang klase sa Colegio de Sta Rita de San Carlos Inc.
