Gindismiss na sa serbisyo ang empleyado sang Office of the Provincial Agriculturist sang Negros Occidental may kaangtanan sa pagkadula sang 789 ka sako sang abono sa Rice Processing Center warehouse sa Barangay Tabunan, Bago City.
Si Herminigildo Basilio, Agriculturist 1, ang ginpasakaan sang kaso nga Grave Misconduct, Serious Dishonesty kag Malversation of Public Funds santo sa 2017 Rules on Administrative Cases in the Civil Service (RACCS).
Madumduman nga si Basilio kag isa ka Job Order casual ang imbulbado sa insidente kun sa diin natukiban na lamang sang Cauayan Municipal Government nga wala na ang napartinisir kuntani nga abono para sa banwa gikan sa Department of Agriculture.
Ang nadula nga 789 ka sako sang abono ang nagabalor sang P2,367,000.
Ang job order employee ang wala na ginpahanugutan nga makarenew sang trabaho samtang si Basilio ang ginpadal-an naman sang show cause order sang Abril subong nga tuig.
Kasunod sang pagsabat sa show cause order, sang Mayo 3, ang respondent ang nakabatun sang formal charges gikan sa Office of the Governor sang Hunyo 2.
Matapos ang imbestigasyon, natumod nga si Basilio ang administratively liable sa nasambit nga kaso.
Kaupod sa dismissal sa serbisyo, mangatubang man ini sang accessory penalties nga ginalakipan sang cancellation sa eligibility, perpetual disqualification sa pagkapot sang bisan ano nga public office, ginadumilian sa pagpakigbahin sa civil service examinations kag forfeiture sang retirement benefits santo sa Section 57, Rule 10 sang 2017 Rules on Administrative Cases in the Civil Service.
