Non-bailable ukon wala sang pyansa ang kaso nga ginaatubang sang tatlo ka mga lalaki nga nagpatay sa maestro nga si Tony Lazaga sa banwa sang Binalbagan sang Miyerkules sang kaagahon.
Suno kay Police Major Randy Babor, hepe sang Binalbagan Municipal Police Station, nakasuhan na si Johnrey Castino nga nadakpan sang Miyerkules sang hapon kag subong nga adlaw, pasakaan man sang kaso sa Provincial Prosecutor’s Office sa John Paolo Fernandez nga nadakpan sang Huwebes sang hapon.
Igapalagas naman ang kaso batok kay Jonathan Santilla, 22 anyos, residente sang Barangay San Jose, Binalbagan nga nagsungka kahapon sang hapon.
Suno kay Babor, robbery with homicide kag violation sang Article 294 sang Revised Penal Code ang kaso batok sa tatlo.
Suno sa hepe, non-bailable ang kaso bangud heinous crime ang robbery with homicide.
Suno sa tatlo ka mga suspetsado nga yara sa karon sa custody sang Binalbagan Municipal Police Station, hold-up ang una nila nga tuyo kay Lazaga nga ila ginsundan sang nagpanaog inio sa Ceres bus apang ila nga napatay ang maestro bangud ini ang nagbato.
Pagalantawon naman sang Binalbagan Municipal Police Station kun kinahanglan pa nga ipaidalom sa drug test ang tatlo.
