Masobra sa P1 million nga balor sang illegal nga druga ang nakumpiskar sa 57 anyos nga anay priso sa Purok Pablo Torre, Barangay Vista Alegre, Bacolod City, kahapon alas 4:25 sang kaagahon.
Ang suspetsado ang ginkilala nga si Alfredo Aplasca Jr, alyas “Nene”, 57 anyos, single, wala sang trabaho, residente sang nasambit nga lugar kag ginakabig nga isa ka High Level Individual.
Madumduman, sang Agosto 10, masobra P14 million nga balor sang suspected shabu ang nakumpiskar sa anay priso nga si Michael Frias sa amo man nga lugar.
Sa interviiew sang Bombo Radyo kay Police Captain Joven Mogato, pinuno sang City Drug Enforcement Unit sang Bacolod City Police Office, mag-abyan sanday Aplasca kag Frias kag sila nga duha ang parehas nga maka-agi na nahunong sa New Bilibid Prison sa Muntinlupa City./
Si Frias ang nakagwa sang 2019 samtang si Aplasca naman ang nakagwa sang 2022.
Sila man nga duha ang parehas nga naggikan sa Barangay 22, Bacolod City kun sa diin mag-abyan na ang mga ini humalin sang sila bata pa.
Suno kay Mogato, sila nakabaton sang impormasyon nga may yara sang pagbaligya-anay sang illegal nga druga sa area kag ila ini gin-validate.
Sa duha nila ka semana nga pagpanilag, positibo nga may transaksyon sang illegal nga druga sa area kag amo nga gin-conduct ang buy bust operation kay Aplasca.
Nakumpiskar kay Aplasca ang pito ka plastic sachet sang suspected shabu nga nagabug-at sang 153 ka gramo kag nagabalor sang P1, 040, 000.
Padayon sa gihapon ang pag-interrogate kay Aplasca kun isa ukon separado ang ginakuhaan nila ni Frias sang supply sang illegal nga druga.
