Magasunod ang mga manunudlo sa mandu sang tiglikom sang Department of Education nga hawanan ang mga dekorasyon sa sulod sang classroom apang nagalaom ang mga ini nga mapatuman ang matuod nga reporma sa departamento.
Sa interview sang Bombo Radyo kay Richard Gelangre, principal sang Bacolod City National High School, indi tuman ka makakilibot ang mandu apang aminado ini nga naplastar na sang mga manunudlo ang mga dekorasyon pila ka adlaw antes ang opening of classes gani dugang naman ini nga ulubrahon.
Apang bangud mandu ini sang DepEd secretary, sila ang magasunod diri.
Suno kay Gelangre, mahimo nga nakita ni Vice President Sara Duterte nga mahawan ang classrooms sa private schools.
Sa pihak sini, nagaayo si Gelangre sa DepEd secretary nga talupangdon man ang iban nga problema sa mga eskwelahan magluwas sa madamo nga dekorasyon sa classrooms kaangay sang kakulang sang mga hulot-klasehan, madamo nga load kag reports kag seminars sang mga manunudlo kag ginahingyo nila nga dugang sa sweldo.
Suno diri, madamo na gid ang report nga ginasumiter sang mga manunudlo bisan lapaw na alas-5:00 sa hapon.
Nagalaom si Gelangre nga mapatuman ang matuod nga reforms sa Education Department bangud overloaded man sang impormasyon ang mga manunudlo kun sobra-sobra na ang seminar.
Suno diri, nagakadula ang mga teachers sa classrooms bangud madamo ang ila ginatambungan nga seminar.
Aminado ang principal nga wala pahuway ang mga manunudlo subong nga school break bangud padayon man ang ila pagbalik sa eskwelahan para sa seminar kag iban pa nga buluhaton.
