Gin-inagurahan na kahapon ang panibag-o nga Bureau of Fire Protection (BFP) sub-station sa Barangay Mandalagan, Bacolod City.
Sa interview sang Bombo Radyo Bacolod kay Fire Chief Superintendent Jerry Candido, Regional Director sa BFP Regional Office 6, ang substation sa Barangay Mandalagan ang ikawalo na nga fire substation sa Bacolod City samtang ika-26 naman sa bilog nga Western Visayas.
Suno kay Candido, may mga BFP stations nga may masobra sa isa nga firetrucks gani ginapakamaayo sini ang pagtukod sang fire substations bangod sa masami nga reklamo sang mga residente sa madugay nga pagresonder.
Pinaagi sini mas madasig nga mapadulungan sang mga fire substations ang mga sunog ukon iban pa nga emerhensya nga malapit sa ila area.
Samtang may natalana naman nga igahatag nga firetrucks para sa Barangay Banago kag Estefania, bangod sila ang madamo sang sakop nga congested nga mga lugar.
Paathag sini nga ang lugar nga madamo sang tawo ang may dako man nga posibilidad nga luntaran sang sunog kag iban pa nga emergencies.// Ginatinguhaan naman nila nga mamaximize ang personnel bangod 120 lamang ang ginahatag nga personnel sa Western Visayas kada tuig kag napulo ka mga firetrucks.
Sa substation, sila ang magahamtang sang pito ka tawo kag isa ka supervisor samtang ginatrain naman ang mga Barangay Tanod kag opsiyales sa Barangay nga mahimo magbulig sa mga BFP personnels.
Suno kay Candido, indi kaangay sa iban nga rehiyon nga nagapangita pa sang makasponsor antes makatukod sang fire substations, siya ang nagapakig-angot sa mga Punong Barangay agud makapartinisir ang mga ini sang budget sa programa.
Ang 1,000 gallon capacity firetruck nga pagagamitun sa Mandalagan Fire Station ang iya man sang BFP Bacolod apang ginpagamit lamang nakaligad sa Sapian, Capiz bangod naguba ang ila nga firetruck.
Sa 40 ka mga State of the Art Firetruck nga gintalana para sa Western Visayas, 25 na ang nahatag kun sa diin may-ara sang tatlo nga yara sa BFP Bacolod.
