Nagpadala sang sulat si Bacolod City Mayor kay suspended Punong Barangay Joseph Delos Santos sang Barangay 16, nga nagapabor sa suspension order nga gindagdag sang Sangguniang Panlungsod.
Madumduman nga matapos ang 6-months suspension kay Delos Santos bangod sa indi nangin pagbayad sa mga casual employees sang Barangay sadto, siya ang liwat nga ginpamatbatan sang anom ka bulan nga suspension sang Sangguniang Panlungsod sang Agosto 2 bangod sa wala sang nahatag nga eksplinasyon sa lima ka sunod-sunod nga indi pagtambong sa Barangay session.
Apang sang Agosto 7, nakibot ang tanan matapos nga magsulod si Delos Santos sa Barangay Hall sa panindugan nga siya na liwat ang Punong Barangay kag may otoridad sa pagpirma sa mga papelis.
Bangod sini, duha ang Punong Barangay nga nagpungko sa nasambitan nga adlaw, bangod nagapungko man si acting Punong Barangay Stella Dela Peña.
Ini bangod ginapanindugan ni Delos Santos nga ang alkalde lamang ang may ikasarang sa pagpanaog sang suspension order gani wala sini ginabatun ang desisyon sang City Council.
Sa interview sang Bombo Radyo Bacolod kay Bacolod City Councilor Al Victor Espino, chairperson sang Committee on Laws sa Sangguniang Panlungsod, si Delos Santos ang nagpadala sang sulat sa Office of the Mayor nga nagakwestyon sa suspension order.
Gani bilang sabat, si Benitez ang nagpagwa man sang letter nga naka-address kay Delos Santos nga nagapabor sa desisyon sang Sangguniang Panlungsod.
Dugang pa diri ang paandam nga kun padayun nga magpakatig-a ang suspendido nga Punong Barangay kag indi kilalahon ang desisyon sang SP, mahimo na ini nga mapasakaan sang criminal case nga Usurpation of Authority sa idalum sang Article 177 sang Revised Penal Code.
Ini ang may sentensya nga minimum tubtob medium period nga pagkapriso.
