Linibo ka mga residente ang nag-evacuate sa JR Torres Elementary School sa Barangay Singcang Airport diri sa ciudad sang Bacolod bangud sang pagbaha halin kaina sang aga.
Suno kay former Bacolod City Councilor Caesar Distrito, malapit 1,000 ka mga pamilya ang apektado sang baha kag naevaluate naman sang Department of Social Services and Development.
Suno kay Distrito, halos tanan nga purok ang apektado sang baha subong nga adlaw.
Tatlo ka evacuation centers ang ila gintiniran nga ginalakipan sang JR Torres Elementary School, barangay hall kag Our Lady of Peace and Good Voyage kun sa diin yara ang pinakamadamo sa elementary school.
Indi naman magnubo sa 5,000 ka mga indibidwal ang nagpadulong sa JR Torres Elementary School apang madamo pa ang wala nagbiya sa ila balay bangud ila ginabantayan ang ila mga gamit agud indi pagkawaton.
Wala pa man nakapamahaw ang iban nga nag-evacuate sa eskwelahan gani naghanda ang barangay sang pagkaon, samtang nagpadala man sang bulig ang iban nga mga konsehal sang ciudad.
Base sa volume sang ulan halin kagab-i, ginalantaw ni Distrito nga mas dako ang nagdaludo sa Singcang Airport halin sa kabukiran.
Nagalaom naman ini nga wala sang residente nga namissing kadungan sang baha, kaangay sang tinalikdan nga naglabay ang Bagyo Egay.
