Ginalauman nga amat-amat na nga makapauli ang mga residente nga nag-evacuate sa JR Torres Elementary School sa Barangay Singcang Airport diri sa ciudad sang Bacolod kun mag-untat na ang pag-ulan.
Kaina sang aga, may libre nga check-up sa mga residente kag ginhatagan sang bulong ang nagakinahanglan sang medical treatment.
Suno kay Araceli Pinongan, staff sang Department of Social Services and Development, 84 ka mga pamilya ukon 189 ka mga indibidwal ang yara sa sulod sang JR Torres Elementary School tubtub kaina sang udto.
Nagpauli naman kaina ang iban nga mga residente apang nagabalik sila sa evacuation center agud nga magkaon.
Kun mag-ayo na ang panahon, ginalauman nga makapauli na ang mga ini subong nga hapon.
Ginpa-fill up man ang mga ini sang form agud mahibaluan kun nagakadapat sila nga magbaton sang ayuda para sa mga pumuluyo nga nagub-an sang balay.
As of kaina sang udto, 58 ka mga pamilya ang nagreport nga partially-damaged ang ila balay samtang wala naman sang totally-damaged.
Nagalaom naman ini nga makigbahin ang mga evacuees sa cleanliness sang eskwelahan bangud mahimo nga magasugod na ang klase bwas nga adlaw.
Suno naman sa evacuee nga si Charlita Decena nga residente sang Purok Sampaguita III, kahapon pa sila nag-evacuate bangud nagsaka ang lebel sang tubig tubtub sa hawak.
Wala man ini sang masaway sa ila nga sitwasyon sa evacuation center bangud maayo man ang ila pahuway.
Ini na ang ikaduha nga kahigayunan nga sila ang nag-evacuate halin sang naglabay ang Bagyo Odette.
Suno diri, naanad na ini nga nagasaka ang lebel sang tubig sa Singcang Airport kun malain ang panahon.
