Nagadangat sa P43 million ang pondo nga sarang nga magamit sang syudad sang Bacolod kasunod sang pagpaidalum sa State of Calamity sang syudad sang Bacolod bangod sa lapnagon nga nangin pagbaha.
Sa interview sang Bombo Radyo Bacolod kay Bacolod City Councilor Thaddy Sayson, chairperson sang Committee on Finance sa Sangguniang Panlungsod, P162,500,00 ang total budget for disaster sang syudad sa bilog nga tuig.
30 percent diri ang quick response fund ukon P48,750,000 santang ang 70 percent ang para sa preparedness and mitigation projects nga P113,750,000.
Suno kay Sayson, sila ang nakakuha sang P20 million gikan sa quick response fund, samtang ginreallign man sang mga ini ang P4 million para sa wellfare goods gikan sa pondo para sa COVID.
Paathag sang konsehal nga bangon wala naman halit ang COVID-19, ginreallign nila ang pondo para sa disaster relief.
Magluwas dira magakuha man sila sang pondo gikan sa savings sang syudad nga balor P19,500,000 agud itransfer sa relief operations kaangay sang igapanghatag nga bugas, delatas kag iban pa.
Bangod naaprubahan na ang P43 million nga budget, igapreparar na lamang sang mga ini ang papelis kag ini ang ginalantaw nga magamit na sa una nga mga inadlaw sang masunod nga semana.
Gin-umpisahan naman sang mga ini ang assessment sa mga nagub-an sang mga panimalay partikular na ang mga malala ang naangkon nga kahalitan.
Ang assessment ang ginapatigayon naman sang Barangay kag sang Department of Social Welfare and Development (DSWD).
Panawagan ni Sayson sa mga nagub-an sang balay nga indi na paghulaton nga sila ang padulungan, kundi sila na mismo ang magpadulong sa Barangay kag magreport sang kahalitan agud nga ini ang ma-assess sang DSWD.
Suno sa konsehal, mahapos lamang ang requirement bangod kinahanglan lamang nga mapamatud-an ang pagkaguba sang balay kag pamatuod nga sila ang residente kag nagapanag-iya sang naguba nga balay, nga mahimo pinaagi sa pagpirma sang Punong Barangay.
Bangod para sa bilog nga Bacolod City ang deklarasyon, hingyo ni Sayson sa mga indi tuman ka nahalitan nga indi mag-imbento sang estorya bangod sila ang magaconcentrate sa mga labi nga naapektuhan.
Wala naman nagakahulugan nga ubuson nila ang P43 million nga na-aprubahan nga pondo.
