Aprubado na sang National Electrification Administration ang pagkanselar sang nabilin nga duha ka adlaw nga plebisito para sa Joint Venture Agreement sa tunga sang Central Negros Electric Cooperative kag PrimElectric Holdings Incorporated.
Ini bangod nga nalab-ot na sang CENECO kag PrimeElectric ang 50 percent plus one nga required nga YES nga boto.
Nagpadala sang sulat ang CENECO sa NEA nga nagahingyo nga ikanselar ang plebisito nga natalana sa petsa sa Setyembre 2 kag 3 nga amo ang ulihi nga duha ka adlaw nga nabilin para sa plebisito.
Sa ginpatigayon nga plebisito sang Agosto 27, sa 178,236 ka mga member-consumers, 98,591 ukon 55.31 percent ang nagboto sang YES samtang 6,899 naman ang nagboto sang NO.
Gin-aprubahan sang NEA ang hingyo sang CENECO kag sarang na sang kooperatiba nga magdeklarar sang termination sang plebiscite kag ginpangayuan sini ang CENECO sang canvass sang tanan nga voting result.
Suno kay CENECO acting general manager Atty. Arnel Lapore, ginalauman sini nga ang JVA ang magahatag sang mas masanyog nga serbisyo para sa tanan kasubong man nga ginalauman sini nga aprubahan sang kongreso ang franchise.
