Nagapati ang chairperson sang committee on agriculture and fisheries sa Sangguniang Panlungsod sang Bacolod nga may yara sang problema sa implementasyon sang Executive Order No. 39 nga nagatalana sang price ceiling sang bugas.
Sa interview sang Bombo Radyo kay Councilor Thaddy Sayson, may problema kag kulang sa implementasyon sang price ceiling bangod pwede nga ipeke ang packaging, ukon intuon sang reatailer ang manugbakal nga ang ila ginbakal ang imported nga bugas, apang sa kamatuoran ini ang locally produced products.
Posible nga matabo ang ini nga pagpang-into ilabi na nga may gin-implementar nga price ceiling kun sa diin nagakangahawa ang mga negosyante nga wala sila sang maginansya.
Suno diri, kun indi kabalo ang costumer magkilala sang bugas nga well milled, regular milled kag imported nga bugas, mahimo nga sila baligyaan sang barato nga bugas sa mahal nga presyo.
Gani para kay Sayson, isa man ka problema amo nga wala sang price cap sa mga imported nga bugas.
Ginapanagabay sang konsehal nga mangin klaro ang pag-implementa sang EO kasubong man nga may mapagwa nga Implementing Rules and Regulations (IRR) ang Department of Trade and Industry sa pagkontrol sa presyo sang bugas.
