Nagahingyo ang city administrator sang Bacolod sa mga konsumidor nga maghagan-hagan lang sa pagbakal sang tag-P45 nga kilo sang bugas nga available sa Burgos Public Market, Libertad Public Market, kag Central Public Market.
Suno kay City Administrator Atty. Pacifico Maghari III, ini trial pa lamang sang ciudad kag ginapanilagan ang lakat sang ini nga programa.
Suno diri, tinituyo ni Bacolod City Mayor Alfredo Benitez nga masuguran ang pag-implementar sang Executive Order No. 39 nga pagpatuman sa price ceiling sang bugas.
May yara sang ginpili nga mga retailer naggikan sa tatlo ka merkado nga baligyaan sang ciudad sang bugas kag ginalauman sini nga madamo sang maka-ambit sang barato nga bugas.
Pahayag ni Maghari, prayoridad nga mabaligyaan sang ciudad amo ang constituents sang Bacolod.
Apang nagapangayo lamang ini nga magbaligya sang insakto ang mga retailers nga kun tani ang ginbakal nila sa ciudad ang indi pag-ibaligya sa presyo nga mahal.
Sila man magabutang sang notice sa mga stores nga ginbaligyaan sang ciudad sang bugas agud makita sang mga konsumedor nga available sa amo nga store ang tag P45 nga kilo sang bugas.
Sa karun wala pa sang gindihon nga pagsulondan sa maximum nga mabakal sang mga konsumedor nga kilo sang bugas apang nagahingyo si Maghari nga maghagan-hagan sa pagbakal agud makatilaw man ang iban.
