Ginpasalig ni Vice President kag Education Secretary Sara Duterte kay Negros Occidental Governor Eugenio Jose ‘Bong’ Lacson nga sarang na makabaton sang donasyon nga classrooms nagikan sa Philippine Amusement and Gaming Corporation.
Sa interview sang Bombo Radyo kay Lacson, nakaangkon ini sang tsansa nga makaistorya kay Duterte kadungan sang launching sang World Teachers Month sa Panaad Park and Stadium kahapon kag ginkumpirmar niya sa secretary ang partnership sang PAGCOR kag DepEd.
Ini bangud sang tion ni former Secretary Leonor Briones, wala ini nagbaton sang donasyon nagikan sa PAGCOR.
Ginhatagan naman ini sang instruction nga masulat lang sa PAGCOR kun sarang sila makapatindog sang dugang nga classrooms sa napili nga lugar.
Suno kay Lacson, indi na bag-o ang problema sa kakulang sang classrooms gani nagatinguha ini nga makakuha sang dugang nga pondo kaangay sang ginpatindog sa banwa sang Hinigaran.
Suno sa gobernador, dako pa nga bulig ang bisan pila lang ka classrooms nga mahatag sang PAGCOR bangud ginpahanugutan naman ini sang DepEd secretary.
Kampante naman ini nga nalipay si Duterte kag duha ka mga senador sa mainit nga pagbaton sang Negros Occidental.
Apang bangud sa kasakuon sang bise presidente, aminado ang gobernador nga indi na ini makatambong sa culmination sang Teachers Month sa Oktubre 5.
Suno sa opisyal, mismo ang Division Office ang naghingyo sa Kapitolyo nga imbitaron si Duterte kag ginbaton man ini sang Office of the Vice President.
