Nagalaom ang mga manunudlo sa ciudad sang Bacolod nga matuman ang mga ginpromisa ni Vice President kag DepEd Secretary Sara Duterte sa iya nga pag-atubang sa mga manunudlo sa launching sang World Teachers Month sa Panaad Park and Stadium kahapon.
Sa interview sang Bombo Radyo kay Richard Gelangre, principal sang Bacolod City National High School kag presidente sang Bacolod City Public School Teachers Federation, iya sang Division of Negros Occidental ang kahiwatan kahapon kag ginpangunahan sang provincial government.
Isa sa mga maayo nga ginhinambit ni Duterte amo ang 30 dias nga tayuyon nga bakasyon sang mga manunudlo.
Sa idalom sang Magna Carta of Teachers suno kay Gelangre, may 75 vacation days ang mga manunudlo apang wala man ini gina-obserbar bangud padayon sila nga nagabalik sa eskwelahan.
Suno kay Gelangre, kapitan sang mga manunudlo ang ginpahayag ni Duterte bangud ginpasalig man sini nga siya ang magamandu sa mga regional directors panaog sa principal angot diri.
Suno sa iya, ginalauman na nga manukot ang mga maestro kag maestra sa ginpromisa sang DepEd secretary gani dapat nga ini ang tumanon.
Kada Teachers Day naman, may yara sang P1,000 nga cash incentive ang eligible nga manunudlo.
Nagalaom man ini nga matuman ang ginpahayag ni Duterte nga mahire sang 6,500 ka administrative assistant agud nga mabuhin-buhinan ang load sang teaching personnel bangud kulang pa ang mga ini, ilabi na nga 47,000 ang kabug-usan nga eskwelahan sa bilog nga pungsod.
Wala pa man natumod kun paano itagtag ang 6,500 ka non-teaching personnel sa bilog nga pungsod.
