Aminado ang gobernador sang Negros Occidental nga katungdanan na sang Department of Trade and Industry ang pagmonitor kun ginatuman sang mga rice retailers ang price ceiling sa bugas, santo sa mandu ni President Bongbong Marcos.
Suno kay Governor Eugenio Jose ‘Bong’ Lacson, indi makasubsidize ang provincial government agud nga mapapanaog sa P41 ang kilo ang regular-milled rice kag P45 naman para sa well-milled rice.
Apang dapat nga sandigan suno sa iya ang pahayag sang national leaders nga mahimo nga isubsidize ang mga retailers kun sa diin tumuron lang ang legitimate retailers agud nga makabaton sang ayuda.
Indi masigurado sang gobernador kun may nagasunod sa mandu sang presidente apang bangud executive order ini sang chief executive, may yara sang katungdanan diri ang kada ahensya sang gobyerno, kaangay sang Department of Trade and Industry nga amo ang magamonitor sa mga merkado.
Kun nagakinahanglan ang DTI sang dugang nga tawo para sa monitoring suno kay Lacson, sarang gid makapahulam ang Kapitolyo sang job order casuals nga makabulig sa pagmonitor.
Suno kay Lacson, indi problema ang supply sang bugas apang tuman kataas ang presyo gani may nagareklamo nga retailers bangud gintalana ang price ceiling.
Suno sa gobernador, wala naubusan sang bugas sa Negros Occidental bangud may locally-produced kag may ginabakal man ang commercial traders.
Bangud staple food ang kan-on, indi gid ini madula sa pagkaon sang mga Pilipino bisan ireduce pa ang konsumo.
