Aminado ang pila ka mga pamilya nga nagaistar sa fire prone areas sa ciudad sang Bacolod nga kinahanglan nila nga magsaylo sa relocation site agud ila na gid ang duta kag indi na sila makabig nga informal settlers.
Sa record sang Bureau of Fire Protection, may yara sang masobra 100 ka mga community sa ciudad sang Bacolod nga ginakabig nga red zone ukon prone sa sunog.
Madumduman nga malapit 40 ka mga balay ang nasunog sa Purok Tangkong, Barangay 7 sang Sabado sang gab-i.
Suno kay Bacolod City Mayor Alfredo Benitez, 38 ka mga balay ang totally-burned, duha ang partially-burned samtang 63 ka pamilya ukon 201 individuals ang apektado sang sunog.
Suno kay Benitez, ginhatagan sang hot meals ang mga fire survivors nga nagatinir sa gym sang Barangay Villamonte.
Sa pagbisita ni Benitez sa gym, sila ang nanghatag sang folding beds, sleeping kits, hygiene kits, modular tents, water jugs kag iban pa.
Gin-istorya man sang local chief executive ang mga residente bangud ginpatindugan nila sang balay ang dalan kag indi na makalabay ang firetruck kun may sunog.
Suno sa alkalde, igasaylo sa relocation site ang mga pamilya nga nagaistar sa balay nga nagatungtong sa dalan.
P15,000 angt ayuda nga igahatag sang city government para sa totally-damaged samtang P10,000 naman ang partially-burned kag ginaproseso naman ang ila nga relocation.
Isa naman sa mga alternative nga sayluhan amo ang Yuhum Village bangud nakahibalo man ang mga ini nga indi ila ang duta.
Sa iya nga pagpamangkot sa mga nasunugan, aminado man ang mga ini nga kinahanglan nila magsaylo gani ginadihon suno sa alkalde ang housing program nga mangin ila na sa ulihi ang balay agud nga sila ang maganyat.
