Padayon pa ang pag-isip sa mga pamalay nga nasunog sa duha ka zone sa Sitio Dacutan Dako, Barangay Mambulac, Silay City kaina sang kaagahon.
Suno kay Rose Ann Chavez nga yara sa Zone 9, nakabugtaw nalang sila sang iya nga bana kag isa ka bata bangud mainit na ang palibot, kag didto na nila nakita nga dako na ang kalayo sa tupad nila nga balay nga iya sang iya pakaisa.
Bangud dako na gid ang kalayo, ginsalbar nalang ni Rose Ann ang importante nga dokyumento kaangay sang live birth kag diploma sang iya bata apang wala gid sila sang nasalbar nga iban nga kagamitan.
Bangud human sa light materials ang ila balay, madasig lang ini nga gintupok sang kalayo.
Base sa inisyal nga impormasyon nga nakuha ni Chavez, nagikan pa sa Zone 10 ang sunog kag nakalab-ot sa sila sa Zone 9.
Ginahibalo pa ang ginhalinan sang kalayo bangud may nagasiling nga halin ini sa kandila ukon sa mosquito repellent.
Nag-augment naman ang mga fire engines nagikan sa kaiping nga ciudad kag banwa agud madasig nga mapalong ang kalayo.
Sang Pebrero tuig 2022, may nagluntad man nga sunog sa amo nga lugar.
