Ginbaton na sang National Electrification Administration ang resulta sang plebisito para sa Joint Venture Agreement (JVA) sa tunga sang Central Negros Electric Cooperative (CENECO) kag PrimeElectric Holdings Inc.
Sa sulat nga napetsahan Setyembre 12, 2023 nga pirmado ni NEA Administrator Antonio Mariano Almeda, ginabatun na sang ahensya ang resulta sang plebisito nga ginsumiter sang CENECO.
Nahibaluan nga nakapagkit diri nga 98,591 ka mga member-consumer ang nagboto pabor sa JVA samtang 6,899 naman ang nagpamatok.
Bangod sa mayorya sang member-consumer nga nagdangat na sa 55.81 percent sang kabug-usan nga numero ang nagpabor sa JVA, ang CENECO ang nagakinahanglan na lamang nga magsumiter sang orihinal nga kopya sang JVA sa NEA, para sa consent.
Sa idalum sang Presidential Decree No. 269 ang CENECO ang dapat nakahanda nga magsabat sa ano man nga pamangkot ukon kwestyon sang NEA angot sa JVA.
Dugang pa diri, ang NEA ang may gahom nga magbutang sang dugang nga kondisyon sa JVA para sa proteksyon sang mga member-consumer sang CENECO.
Ang tanan nga lending source gamit ang propedad sang CENECO ang magalabay man sa consent sang NEA.
Sa tion nga mabatun na ang consent gikan sa NEA, sarang na ang mga ini nga makasumiter sang mga papeles para sa pagkuha sang prangkisa para sa JVA.
Nagalaom si CENECO Acting General Manager Atty. Arnel Lapore nga magrant gilayon ang ila nga request agud maka-operar na sa labing madali nga panahon ang JVA.
Nahibaluan nga sa JVA, 70 porsyento sang Power distributor ang pagakaptan sang PrimeElectric kalakip na ang management, samtang ang 30 porsyento ang magapabilin sa CENECO.
