Nakabaton na sang financial assistance gikan sa Department of Social Welfare and Development (DSWD) Region 6 ang 37 ka magagmay nga rice retailers sa Negros Occidental.
Nahibaluan nga matapos gin-implementar ang Executive Order No. 39, nga nagatalana sang price ceiling nga P41 sa kada kilo sang regular-milled rice kag P45 sa well-milled rice, ginpalista man sang Presidente ang mga rice retailers nga naapektuhan sang hinali nga pagpatuman para mahatagan sang P15,000 nga financial assistance.
Sa interview sang Bombo Radyo Bacolod kay DSWD Region 6 Assistant Director Arwin Razo, kadungan sa pay-out sa Negros Occidental nga ginpatigayon sa Negros Occidental Food Terminal Market, may-ara man sang payout sa probinsya sang Iloilo.
Ang iban nga mga local government units (LGUs) sa Western Visayas ang natalana naman nga makabatun subong nga adlaw.
Paathag ni Razo nga 1st batch pa lamang ang nahatagan kag ini ang mahimo madugangan pa inkaso nga maghatag sang dugang nga lista ang Department of Trade and Industry (DTI).
Nahibaluan nga yara sa kamot sang DTI ang pagmonitor kag paglista sang mga rice retailers nga nagsunod sang ginmando ang price ceiling samtang ang mga pangalan ang ginapadala naman sa DSWD.
Madumduman nga pila sa mga reklamo sang rice retailers amo nga sila ang mamierdihan inkaso nga ibaligya nila santo sa price ceiling ang ila nga bugas bangod mahal ang ila nga kuha sa supplier.
Bangod sina, madamo sang mga wala nagsunod sa pagpatuman.
Gani ang mga nagpanubo lamang sang presyo ukon ginpili nga mamierdihan agud lamang makasunod sa EO No 39 amo ang makabig eligible sa financial assistance.
Paathag ni Razo nga ID lamang ang kinahanglan dal-on sang mga rice retailers kag kun yara ang ila pangalan sa listahan, gilayon man nga ginahatag ang financial assistance. Samtang, dako naman nga bulig para sa isa ka rice retailer gikan sa syudad sang Kabankalan ang pagbatun sini sang P15,000 nga financial assistance may kaangtanan sa pagpatuman sang price ceiling sa bugas.
Sa payout sang financial assistance sa mga rice retailers nga naapektuhan sang price ceiling kahapon sa Negros Occidental Food Terminal Market, 37 ang mga rice retailers sa probinsya nga nakabatun sang bulig pinansyal.
Isa na diri si Jocelyn Jungco, nga rice retailer sa Kabankalan City.
Suno sa iya, umpisa pa lamang nga adlaw sang pagpatuman sang price ceiling nga P41 sa kada kilo sang regular-milled rice kag P45 sa kada kilo sang well-milled rice, nagsunod naman ini sa mando apisar pa nga siya ang namierdihan.
Nahibaluan nga ang P15,000 nga financial subsidy gikan sa Department of Social Welfare and Development (DSWD) Western Visayas ang ginpanghatag agud makabawi sa balor sang nangin kapierdihan sang mga rice retailers sa pagbaligya sang ila daan nga supply sang bugas sa manubo nga presyo.
Panindugan ni Jungco nga ginpanguyatan niya ang pasalig sang personnel sang Department of Trade and Industry (DTI) nga sila ang makabatun sang financial assistance kun sila ang magsunod sa price ceiling.
Suno diri, gikan sa anay P2,300 tubtob P2,400 nga presyo sang kada sako sang bugas, sa karun ini ang nagnubo naman sa P1,900 para sa regular-milled rice samtang nagahamboy naman sa dos mil pesos ang presyo sang well-milled nga bugas.
Santo sa karun nga presyuhanay, ginpahayag ni Jungco nga sila ang may-ara naman sang gamay nga maginansya.
Ginpasalamatan man sang rice retailer ang National Government sa madasig nga nangin tikang sa problema.
