Natumod nga nag-angkon sang madamo nga buno sa likod ang bangkay sang lalaki nga nasapwan kahapon ala-1:24 sang hapon sa Palanca Road, Barangay 2, Bacolod City.
Madumduman nga sang nasapwan ang bangkay ini ang nagahapaon, nakabaklid kag nakahigot ang mga kamot sa likod samtang ini ang may busal nga duct tape sa bibig.
Sa interview sang Bombo Radyo Bacolod kay Police Captain Glenn Montaño, station commander sang Bacolod Police Station 2, natumod sa imbestigasyon sang Scene of the Crime Operation (SOCO) nga madamo sang pilas sa likod ang biktima tuga sang pagpamuno.
Apang sa pihak sina, wala sang gisi ang sweatshirt nga suksok sang biktima kag indi man madamo ang tinulo sang dugo nga makit-an sa area kun sa diin nasapwan ang bangkay.
Bangod sini, nagapati si Montaño nga ginpatay na ang biktima antes paman ginpa-ilisan kag ginhal-id sa bahin sang reclamation area pasulod sa BREDCO port.
Suno sa hepe, tubtob sa karun wala pa matumod ang identity sang bangkay kag wala paman sang pamilya nga nagpalapit sa ila agud tsekyaron kun ila himata ang napatay.
Panawagan ni Montaño sa sin-o man nga may himata nga lalaki nga wala pa makapauli nga makig-angot lamang sa Bacolod Police Station 2 agud matsekyar kun ila himata ang biktima.
Ang biktima ang nakapanapton sang itom nga shorts kag sweatshirt nga dark and white color combination kasubong man isa nalang ka bahin sang itom nga tsenilas.
Ang lalaki ang may ginabanta kataason nga 5-foot-4 tubtob 5-foot-6 samtang ini ang ginalantaw naman nga yara sa edad 25 tubtob 35 anyos.
