Ginpahayag sang isa sa mga nasunugan sa Zone 8, Sitio Dacutan Dako, Barangay Mambulac, Silay City, Negros Occidental nga sa balay sini nag-umpisa ang kalayo nga nagtuga sang sunog kaina sang kaagahon.
Sa interview sang Bombo Radyo Bacolod kay Paquito Bacton, tag-iya sang balay kun sa diin nagsugod ang kalayo, nagbugtaw ini ala-1:30 kaina sang kaagahon agud nga mag-init sang tubig agud magpangape.
Suno kay Bacton, pagkatapos sini nga magtimpla sang kape, nagsulod sila sa ila nga balay kun sa diin nakapanimaho ini sang daw sunog kag sang nagtangla ini, nakita niya sa iya nga nagatub-ok na ang kalayo.
Bangud sa kadasig sang paglapta sang kalayo, ginpukaw sini ang iya bata, apo kag ang iya nga bayaw.
Ginhingagaw nila pagwa ang 16 years old niya nga apo nga nagahigda nalang bangud indi na makahulag matapos nga maparalyze.
Suno kay Bacton, wala ini sang nasalbar nga panapton kag bisan ang iya nga kwarta nga sa kwarto niya sa ikaduha nga panalgan sang balay ang wala man nasalbar.
Ginalantaw ni Pacton nga sa electric wire naghalin ang kalayo nga nagtuga sang sunog.
