Ginkumpirmar sang alkalde sang ciudad sang Silay nga may yara na sila sang ginpanghatag nga initial nga bulig para sa mga biktima sang sunog nga nagluntad sa Zone 8, Sitio Dacutan Dako, Barangay Mambulac, kaina sang kaagahon.
Sa interview sang Bombo Radyo Bacolod kay Mayor Joedith Gallego, ang mga biktima sang sunog ang nahatagan na sang foodpacks nga nagaunod sang napulo ka kilo nga bugas kag canned goods.
Suno kay Gallego, ang mga nasunugan ang makabaton man sang financial assistance apang bangud wala ang mga ini sang gamiton sa pagluto, naghatag ini sang cash agud nga may ibakal sang gamiton sa pagluto.
Suno sa alkalde, nakita sini ang kabudlayan sang mga bombero sa pagsulod sa lugar bangud sa makitid nga dalan, gani nakadesisyon ini nga magapatukod sang hydrant sa sulod sang Zone 8, Sitio Dacutan Dako, Barangay Mambulac agud nga indi na mabudlayan sa tion nga kinahanglan sa tion sang sunog.
Ginpahayag man sang alkalde nga nagpamalibad man ang mga pumuluyo nga magpadulong sa Yolanda Housing sang ciudad bisan may yara man sang bakante nga unit didto bangud nalayuan ang mga ini sa ila palangitan-an.
Nagpasalig man ang alkalde sa mga nasunugan nga ang Silay City government ang nakahanda nga magbulig sa ila.
Nagpanugyan man ini sa mga residente nga agud malikawan ang sunog, dapat siguruhon nga nakapatay ang mga switch sang suga kag mga electric devices kag indi pagtugutan ang mga kabataan nga maghampang sang posporo ukon mga bagay nga makatuga sang kalayo.
