Nagdangat na sa P720,000 ang financial assistance nga napanagtag sang Department of Social Welfare and Development Regional Office 6 sa micro rice retailers sa Western Visayas sa una nga adlaw sang pay-out para sa mga apektado sang Executive Order 39 ukon ang pagpatuman sang price cap sa bugas.
Sa interview sang Bombo Radyo Bacolod kay DSWD Region 6 spokesperson Atty. May Rago-Castillo, ang una nga adlaw sang pay-out ang ginpatigayon sa Iloilo City kag Negros Occidental.
Suno kay Castillo, 14 ka mga micro rice retailers sa Iloilo City samtang 34 naman ka mga micro rice retailers sa probinsya sang Negros Occidental kalakip na ang ciudad sang Bacolod ang nakabaton kun sa diin kabug-usan nga P720,000 ang narelease nga financial subsidy.
Sa 37 ka mga beneficiaries sa Negros Occidental kalakip na ciudad sang Bacolod, 34 na ang nakabaton sang subsidy bangud subong nga adlaw ginhatag ang pay-out sang nabilin nga wala pa mahatagan.
Samtang sa iban naman nga probinsya sa Western Visayas, sa Aklan, ginpatigayon ang pay-out subong nga adlaw sa 29 beneficiaries kun sa diin ang kabug-usan nga pay-out ang nagdangat sa P435,000; sa Antique, nagdangat sa 15 ang beneficiaries kun sa diin nagdangat sa P225,000; Capiz nga may yara sang 27 ka beneficiaries kun sa diin nagdangat sa P405,000 ang kabug-usan nga pay-out kag sa Guimaras naman may yara sang 28 beneficiaries kun sa diin ang kabug-usan nga pay-out ang nagdangat sa P420,000.00.
Suno kay Castillo ang Department of Trade and Industry ang nagpatigayon sang profiling samtang ang DSWD ang nagpay-out santo man sa listahan sang DTI.
Suno diri kun may yara sila sang problema sa mga ginpanglakip nga mga beneficiaries sang programa, mahimo sila nga makig-angot sa DTI agud nga masabat ang ila nga mga inquiries.
