Pila ka factors ang ginalantaw sang Office of the Provincial Agriculturist kun ngaa nagsaka ang presyo sang paitan ukon katumbal subong nga bulan.
Sa interview sang Bombo Radyo kay kay acting provincial agriculturist Dina Genzola, P350 ang presyo sang paitan sa mga merkado sa Bacolod kag probinsya sang Negros Occidental kag subong lang nga bulan nagsaka ang presyo, apang mas manubo ini sa presyoahanay sa Metro Manila nga yara sa P700.
Antes ang bulan sang Setyembre, nagahamboy pa lang sa P100 ang presyo sang paitan, apang mahimo nga nagsaka ang presyo bangud sa epekto sang pila ka bagyo kag pagsulod man sang ber months.
Isa man sa mga factors nga ginalantaw amo ang pagsaka sang demand gani gina-engganyo sang OPA ang mga pumuluyo nga magtanom sang utanon sa ugsaran ukon sa mga eskwelahan agud makasapin-sapin sa kinahanglanon.
Diri sa probinsya, ang sixth district kag first district ang may malapad nga talamnan sang high value crops ukon utanon.
Suno kay Genzola, may gindistribute nga binhi sang vegetables sa mga mangunguma kag kaupod sang OPA sa inisyatibo ang Department of Agriculture Region 6.
Ginaengganyo man ang mga nagatanom sang humay nga magtanom sang iban nga tanom kaangay sang monggo kag sandiya kun tapos na ang cropping season agud nga may dugang nga income.
Iya man ginganyat ang mga households nga magpatigayon sang edible landscaping ukon urban agriculture bangud sarang gid makaproduce sang utanon sa ugsaran.
