Isa ka committee hearing ang patigayunon antes ang approval sang Sangguniang Panlungsod sa installation sang carnival sa likod sang Bacolod City Government Center bilang kabahin sang MassKara Festival 2023.
Sa interview sang Bombo Radyo kay City Councilor Israel Salanga nga nagaserbe sa karon bilang acting mayor sang Bacolod, ang tanan nga aktibidades sang ciudad ang kinahanglan nga aprubahan sang Sangguniang Panlungsod kaangay sang closure sang dalan kun may festival.
Sang nagligad nga session sang Konseho, ginkwestyon sang isa ka konsehal ang pag-install na sang carnival sa likod sang Bacolod City Government Center bangud madugay pa ang MassKara Festival kag ginpahayag sang operator nga gintempranuhan ang installation bangud mabudlay ang pagset up kag mahimo nga magdugay ini sang sinemana.
Bangud sini, ginpatawag ang operator agud nga makapaathag sa committee hearing sang committee on laws and ordinances gani temporaryo anay nga ginpauntat sang alkalde ang installation.
Ang carnival ang yara sa idalom sang Bacolod Yuhum Foundation kag mahimo nga wala naorient ang operator nga kinahanglan anay ang approval sang SP antes ang pagset up.
Bangud sini, magaatubang sila sa committee hearing sa masunod nga semana agud nga makapaathag kaupod ang Yuhum Foundation.
Isa naman ini ka reminder para sa iban nga makigbahin sa aktibidad nga isecure ang nagakaigo nga approval antes magset up bangud amo ini ang husto nga proseso kag indi makapatuman sini ang Yuhum Foundation kun wala sang pahanugot.
