Matapos ang madugay nga inaway sa pulitika, makita nga nag-uyatay sang kamot sanday former Bacolod City Mayor Monico Puentevella kag former Bacolod City Mayor Evelio “Bing” Leonardia.
Ini matapos nga isa si Leonardia sa mga nagbisita sa haya ni former Bacolod City First Lady Mrs. Josefa “Patching” Ramos Puentevella.
Alas 2:00 tubtob alas 4:00 kahapon sang hapon nagbisita ang anay alkalde sa Rolling Hills Memorial Chapel agud nga magpakig-unong sa pamilya Puentevella.
Makita sa post ni Nikki Puentevella nga nakaattach ang litrato nga nagauyatay sang kamot ang duha ka anay alkalde kag may caption nga…Your last wish has been granted mommy. Only you makes things happen. Thank you… Samtang isa man ang Bombo Radyo Philippines nga nagpadulong sa Rolling Hills Memorial Chapel agud nga magpakig-unong sa pamilya Puentevella.
Makita man nga okupado ang nasambit nga memorial chapel kun sa diin nahaya ang anay Bacolod City First Lady kun sa diin tuman ka damo nga pamilya, empleyado sang pamilya Puentevella nga nagpadulong didto agud nga magpakita man sang pagpakig-unong sa nalisdan nga pamilya.
