Nagapanawagan ang pamunuan sang Talisay City Police Station sa pamilya ukon himata sang isa lalaki nga wala makapauli nga makig-angot lamang sa ila bangud wala pa sa gihapon makilala ang isa ka lalaki nga nasapwan sa higad sang dalan sa Hacienda Othelia, Barangay Efigenio Lizares, Talisay City kahapon sang kaagahon.
Sa interview sang Bombo Radyo Bacolod kay Police Major Wilfredo Benoman, Deputy Chief of Police sang Talisay City Police Station, wala sa gihapon sang identity ang biktima nga ginabanta nga nagaedad ini sang 60 anyos pasaka, ubanon na, 5’2” ang height, nagasuksok sang jacket kag itom nga dilargo, nauba na ang iya sapatos, samtang wala man sang nakita nga wallet ukon IDs sa iya nga bulsa.
Suno kay Benoman, matapos ang pagtipon sang ebidensya sang katapo sang Negros Occidental Police Provincial Office Forensic Unit, narecover sa lugar ang isa ka fired cartridge sang 9mm pistol.
Ang biktima ang may duha ka pilas sa nawala nga bahin sang ulo.
Nagapadayon sa karun ang imbestigasyon sang Talisay City Police Station agud nga matumod ang gintunaan sang kamatayon sang biktima kasubong man ang mga suspects kag motibo sang krimen.
