Ginaplano sa karon sang city government sang Bacolod kag sang Department of Public Works and Highways ang pagpatukod sang coastal road nagikan sa Barangay Banago padulong sa ciudad sang Victorias sa norte kag banwa sang Pulupandan sa sur.
Suno kay Bacolod City Mayor Alfredo Benitez, may yara na sang feasibility study ang Department of Public Works and Highways para sa coastal road halin sa Barangay Banago padulong sa ciudad sang Victorias.
Agud nga mapahawan ang trapiko sa Dalan Lacson suno sa alkalde, kinahanglan nga may yara man sang coastal road halin sa Barangay Sum-ag padulong sa Barangay Banago.
Naistoryahan naman nila sang DPWH ang paghimo sang coastal road nagikan sa Barangay Sum-ag padulong sa banwa sang Pulupandan agud nga masakop ang bilog nga coastal stretch.
Ini ang isa man sa mga preparasyon para sa Panay-Guimaras-Negros Bridge agud nga indi mangin tuman kagutok ang highway ilabi na sa Barangay Sum-ag.
Sa idalom sang proposal, sa banwa sang Pulupandan magasugod ang taytay nga magakonekta sang Negros Island sa isla sang Guimaras kag Panay gani diri manaog ang nagatabok sa isla.
Suno sa local chief executive, kinahanglan nga subong pa lang, planuhan na ang road network nga maka-accommodate sang mas madamo nga salakyan nagikan sa Panay kag Guimaras agud nga indi maggutok ang major highway.
Ginabanta naman nga magalawig sang pito ka tuig ang construction sang coastal road kag magabalor sang binilyon ka pesos ang nasambit nga proyekto.
Sang nagkitaay sanday Benitez kag opisyal sang DPWH sa airport duha ka adlaw na ang nakaligad, ginpahayag sini nga ginatapos ang feasibility study sang Banago to Victorias Coastal Road kag igaextend naman ang halin sa Sum-ag padulong sa banwa sang Pulupandan.
Suno sa alkalde, dapat nga dungan matapos ang Panay-Guimaras-Negros Bridges kag coastal road.
Kun matapos ang feasibility study suno diri, funding nalang ang kulang para sa proper construction sang coastal road.
