May yara na sang mabakal nga tag-P41 kada kilo nga bugas sa Libertad Public Market sa ciudad sang Bacolod kasunod sang gintalana nga price ceiling nga P41 sa regular milled rice kag P45 sa well milled rice.
Halos tanan nga rice retailear sa Libertad Public Market ang nagabaligya sang tag-P45 nga kilo sang bugas sa well milled rice kag sa karun may yara naman sang nagabaligya nga tag-P41 nga kilo sang bugas.
Sa interview sang Bombo Radyo kay Wilson Sari, rice retailer sa Libertad Publi Market, ang locally produced rice nga nagikan pa sa Iloilo amo ang ila ginabligya nga tag-P41 ukon P1,950 naman sa isa ka sako.
Suno diri, madamo sang nagapangita sang barato nga bugas gani nangin maayo ang baklanay sang tag-P41.
Apang maayo man ang baklanay sa tag-P43, P44 kag bisan P54 nga bugas.
Pahayag ni Sari, naga-ama-amat nubo ang presyo sang bugas bangod nga may harvest na ang Iloilo samtang sa imported naman nga bugas, wala sang pagnubo sa presyo bangod nga mahal gid man ang ila pagbakal sini.
