967 ka mga rice retailers sa kabug-usan nga Western Visayas ang makabaton sang tag-P15,000 nga subsidy gikan sa Department of Social Welfare and Development kun sa diin 27 ka mga rice retailers sa ciudad sang Bacolod ang makabaton sini.
Ini ang ikaduha nga kahigayunan sang pagtagtaganay sang tag-P15,000 nga subsidy.
Sang Setyembre 13, 37 lamang ka mga rice retailers sa region ang nakabaton sang subsidy kun sa diin isa lamang ang nakabaton sa ciudad sang Bacolod.
Apang sa karun, 967 ang yara sa lista nga makabaton kag 27 diri ang sa Bacolod City.
Suno kay Bacolod City Administrator Atty. Pacifico Maghari III, bwas nga adlaw natalana nga ipatigayon ang second round sang pagpanagtag sang subsidy.
Ginkalipay man sini nga makabakal na sang tag-P41 nga bugas sa Libertad Public Market nga nagapakita nga naga-amat-amat na nubo ang presyo sini.
