Nakabaton na ang pila ka mga operators kag drivers sa ciudad sang Bacolod sang fuel subsidy kasunod sang asod-asod nga pagsaka sang presyo sang produktong petrolyo.
Sa interview sang Bombo Radyo kay Albert Villanueva, chairman sang Sentrong Samahan ng mga Tsuper at Operators – Negros (SSTONE), sang Biyernes nakabaton na sang fuel subsidy ang iban nga mga operators kag drivers apang suno kay Villanueva, may yara sang makaluluoy nga mga driver nga wala nakatilaw sang subsidy bangod may mga operators nga nagapanindugan nga ila ang nabaton nga ayuda.
Suno diri, manami pamatian ang ini nga bulig sang gobyerno apang indi manami ang ila sistema sa pagpanagtag.
Gani, ila ginamonitor kun lehitimo nga mga operator ang nagbaton sang subsidy.
Ginkwestyon man sini kun para kay sin-o gid man ang ini nga bulig, para bala sa mga pumuluyo sa kabilogan ukon para sa pinili lang.
Madumduman, nga P10,000 ang mabaton sang modernized jeepneys kag modernozed UV express; P6,500 sa traditional jeepney, buses, mini-bus, taxi, kag shuttle; P1,000 sa tricycle kag P1,200 sa delivery riders.
