Ginaistoryahan sa karon ang pagbody shame sang isa ka konduktor sang modernized jeepney sa isa ka estudyante sa ciudad sang Bacolod.
Suno sa 19 anyos nga si Lanimae Joy Libo-on Mag-aro, traumatizing para sa iya ang nangin eksperyensya sini sang magsakay sa modernized jeep nga RSJ Lines, Inc. nga may ruta nga Homesite-Central Market.
Pagsaka palang sini, siya ang ginhambalan na sang konduktor nga siya ang madako gani duha ka pulungkuan ang iya dapat bayaran, apang wala ini ginpaligban sang estudyante.
Tubtob nga ginpalapitan ini sa pulungkuan kag siya ang naghambal nga estudyante ini, apang ginpanindugan sang konduktor nga P22 ang iya nga bayaran bangod P11 ang bayad sang estudyante.
Bangod sini, nagpahayag na lamang si Mag-aro nga manaog nalang ini sa jeep, nga ginpunggan pa sang konduktor.
Apang siya ang nanindugan nga magpanaog kun sa diin nabatian pa sini ang pagsaway sang isa ka pasahero sa konduktor.
Bangod sa kalain sang buot kag pagkabatyag sang kahuya, ang estudyante ang naghilibion na lamang sa kilid sang dalan.
Panawagan sini sa mga konduktor kag drivers nga maghalong sa mga ginabuy-an nga tinaga kag indi bastuson ang mga pasahero nga nagabayad man sang husto.
Nagpost man natuhoy diri si Marilou Occeña Orio, nga kaupod sini nga nakasakay sa nasambitan nga modernized jeepney kag nakakita sa hitabo, kun sa diin iya man nga gincall-out ang nasambitan nga konduktor.
