Nasapwan nga naga-utaw utaw ang bangkay sang isa ka senior citizen nga babayi nga residente sang ciudad sang Bacolod sa suba sa Sitio Cavan, Pulupandan, Negros Occidental alas-9:30 kahapon sang aga.
Sa interview sang Bombo Radyo Bacolod kay Police Captain Emman Anacleto, hepe sang Pulupandan Municipal Police Station, ang biktima ang nasapwan sang isa ka passenger boat operator nga naga-utaw utaw, gani iya ini nga gindala sa takas kag ginreport sa Purok President.
Sa pagpadulong sang kapulisan, gintsekyar nila ang bangkay sang babayi kag wala man ang mga ini sang nakita nga stab wound ukon gun shot wound, kag wala man sang sign of struggle nga kaangay sang pagkakuga sa liog.
Bangod sini, nagapati si Anacleto nga pagkalunod ang gintunaan sang kamatayon sang biktima.
Kasunod sini gindala nila sa punerarya sa syudad sang Bago ang biktima, kun sa diin ini ang positibo nga ginkilala sang iya nga bata pasado alas-10:00 sang aga.
Ang biktima ang ginkilala nga si Nilda Modesto, 73 anyos, balo, residente sa Barangay 18, Bacolod City.
Suno sa bata sini nga si Ma. Elena Modesto, 44 anyos kag office clerk sa Corazon Locsin Montelibano Memorial Regional Hospital, ang iya iloy ang may deperensya na sa paminsaron kag nagapaidalum sa medication.
Namissing ang iloy sini sang Setyembre 15 pa lamang kag ginalantaw nga mahimo magapadulong kuntani ang iloy sa pamilya sini sa Barangay Tibsok, banwa sang San Enrique.
Suno kay Anacleto, bangod sa problema sini sa paminsaron, mahimo nga ginpinsar sang senior citizen nga siya ang yara na sa San Enrique sang makadangat sa Bago River.
Sa karun padayun pa nga ginahibalo kun paano ini nalumos kag nakadangat sa banwa sang Pulupandan.
