Lunsay mga pangayaw sa Barangay Tabugon, Kabankalan City ang mga napatay nga gina-alegar miyembro sang New People’s Army kasunod sang engkwentro batok sa militar kagab-i.
Sa interview sang Bombo Radyo Bacolod kay Punong Barangay Ramil Sepida sang Barangay Tabugon, indi nila kilala ang mga napatay sa nagluntad nga engkwentro sa tunga sang 47th Infantry Battalion kag gina-alegar New People’s Army.
Suno kay Sepida, pasado alas 7:00 ang takna kagab-i nagluntad ang engkwentro kun sa diin napatay ang anom nga nagasakay sa tricycle.
Suno diri, aga na nakuha ang mga bangkay matapos nga matsekyar na sang katapo sang Scene of the Crime Operation (SOCO) kag mga kapulisan sang Kabankalan City Police Station.
Suno diri, ginalakipan sang apat ka mga lalaki kag duha ka babayi ang mga napatay kun sa diin isa diri ang ginapahayag nga nagabusong.
Ang mga napatay ang nakaangkon sang madamo nga pilas sa ulo kag li-og.
Suno pa sa punong barangay, ang lugar nga ginluntaran sang engkwentro ang napalibutan sang mga katubuhan kag malayo ang mga balay.
Wala man sang narecord nga evacuees bangud sa engkwentro.
Suno sa barangay official, mahimo nga ginasurveillance na nga daan sang militar ang mga napatay nga gina-alegar miyembro sang NPA.
