Welcome sa 302nd Infantry Brigade kun imbestigaran sang Commission on Human Rights ang pagkapatay sang apat ka mga lalaki kag duha ka mga babayi nga ginaalegar mga miyembro sang New People’s Army sa Purok Lubi, Barangay Tabugon, Kabankalan City kagab-i.
Sa interview sang Bombo Radyo kay 302nd Infantry Brigade commander Brigadier General Joey Escanillas, nagresponde ang team sang Scene of the Crime Operation kasunod sang engkwentro bangud man sa request sang Philippine Army gani makasabat ang mga ini sa dugang nga mga pamangkot kaangay sang kumpirmasyon kun nagabusong gid man ang isa ka babayi nga napatay.
Suno kay Escanillas, legitimate ang operation kagab-i kag calibrated ang ila nga response sa ginsugid sang mga pumuluyo.
Suno diri, kinahanglan nila nga magbalos kun may yara sang nagpalupok gani right response lang ang ila ginhimo.
Suno sa iya, approaching pa lang ang tropa sang nagpalupok ang nagasakay sa tricycle.
Suno sa Army official, indi checkpoint ang ginpatigayon kundi magapamangkot kuntani ang mga suldado sa mga nagasakay sa tricycle agud nga makakuha sang dugang nga impormasyon angot sa report nga may armado nga mga tawo sa Tabugon.
Suno sa iya, wala nagasakay sa salakyan ang nagaresponde sa kaangay nga impormasyon nga ginahatag sang mga pumuluyo bangud mas luwas ang mga suldado kun nagalakat lang.
Ginalantaw sini nga bangud duha tubtub tatlo lang ka suldado ang nakita sang mga rebelde sa tricycle, ila gindumdom nga masarangan nila ini gani nag-una sila palupok.
Sa karon, nagacoordinate ang Philippine Army sa Kabankalan City government agud nga mahibaluan kun ano ang mabulig sini sa pamilya sang mga nagkalamatay bangud magabulig man diri ang militar sa paghatag sa ila sang desente nga lubong.
