Gin-athag sang pinuno sang Public Affairs Office sang 3rd Infantry Division sang Philippine Army nga wala sang kaangtanan ang nagluntad nga engkwentro sa tunga sang mga suldado kag New People’s Army sa Barangay Tabugon, Kabankalan City sang Huwebes sang gab-i sa engkwentro nga natabo sa Lambunao, Iloilo sang Martes sang aga.
Madumduman nga napatay ang 32 anyos nga si Private First Class Mars Echevarria, residente sa banwa sang Ilog apang nakapangasawa sa syudad sang Kabankalan sa nangin engkwentro sang 82nd Infantry Battalion batok sa mga katapo sang NPA sa Sitio Agdalusan, Barangay Jayubo, Lambunao, Iloilo kag isa man ka NPA member ang napatay.
Sang Huwebes sang gab-i, anom naman ka mga NPA ang napatay sa syudad sang Kabankalan nga ginkilala nga sanday Alejo Delos Reyes nga kilala bilang Peter ukon Bravo, Squad Leader sang Squad 2 sa Sangay Yunit Propaganda Platoon 3; Marjon Alvior, nga kilala man bilang Kenneth, Vice Squad Leader sang Squad 2, SYP Platoon 3; Bobby Pedro, nga kilala man bilang Recoy, Vice Squad Leader sang Squad 3 sang pareho nga platoon; Mario Fajardo Mullon, nga kilala man bilang Reco ukon Goring, Medic sang Squad 1 gikan sa pareho nga platoon; Melissa Dela Pena, nga kilala man bilang Diane, ang asawa ni alias Bravo; kag si Ruben Gaitan ang driver sang tricycle.
Sa interview sang Bombo Radyo Bacolod kay Lt. Col. J-Jay Javines, gin-athag sini nga natabuan lamang nga residente sa Kabankalan City si Echevarria, kag pasalig sini nga indi balos sang militar ang natabo nga engkwentro bangod lain man nga grupo sang NPA ang ila kasumpong.
Sa pihak nga bahin, ginpahayag man sini nga makabig nga bayolasyon sa human rights kun matuog gid man nga nagabusong si Melissa Dela Pena bangod indi pwede nga gamiton sa armado nga pagpakigbato ang mga nagabusong ukon kabataan.
Suno kay Javines, nakabatun sang impormasyon ang 47th Infantry Battalion nga may armado nga grupo sa lugar, gani ila nga ginpadulongan kag didto na nagluntad ang engkwentro.
Positibo naman ang mga militar nga katapo sang NPA ang ila nakasumpong bangod kalabanan sa mga ini ang matag-as nga opisyal, kag aminado ini nga malawig nga tinuig ang kinahanglan agud malab-ot sang NPA members ang nasambitan nga ranggo.
Dugang pa sini nga 6th District sang Negros Occidental gid man ang areas of operation sang Southwest front sang NPA.
Kun sa din sila man ang may kahimuan sang madamo na nga mga krimen sa sulod sang pila na ka tuig.
