Indi pa maseguro sang pinuno sang Public Affairs Office sang 3rd Infantry Division sang Philippine Army kun nalakip ang Barangay Tabugon, Kabankalan City sa mga Election Areas of Concern (EACs) matapos nagluntad ang engkwentro sang Huwebes sang gab-i kun sa diin anom ka mga gina-alegar katapo sang New People’s Army (NPA) ang napatay.
Sa interview sang Bombo Radyo Bacolod kay Lt. Col. J-Jay Javines, ang Southwest front sang NPA ang madugay na nga nagabuhat sang mga attrocities sa 6th District sang Negros Occidental.
Kalakip sa mga binuhatan nila amo ang pagpatay sa isa ka pastor sa syudad sang Sipalay sang Pebrero 2020, pag-ambush sa militar kun sa diin duha ka suldado ang napatay sa banwa sang Cauayan sang Abril 2021, pag-ambush sang mga suldado sa Sipalay sang Nobyembre 2022 kun sa diin may-ara man sang suldado nga napatay, pagpanunog sang mga construction equipment sa Kabankalan kag Sipalay sang Marso 2022 kag ang pagpatay sa 65 anyos nga si Silas Granada, sa banwa sang Ilog sang Enero 2023 bangod sa alegasyon nga ini ang informant sang militar, kun sa diin ginkumpirmar mismo sang NPA nga sila ang may kahimuan.
Dugang pa ni Javines nga isa sa cal. 45 pistol nga ila narecover sa engkwentro sang Huwebes ang ginapanag-iyahan sang suldado nga ginpatay sang NPA sa Sipalay City sang Nobyembre 2022.
Santo sa order of battle sang militar, 14 nalang ang nabilin nga katapo sang Southwest front, kag sila ang nabuhinan pa sang Huwebes.
Apang apisar sa mahina nga military power, aminado ang opisyal nga sarang pa sang mga ini makahimo sang limited tactical offensives kaangay sang pagpanunog, ambush kag pagpatay sang inosente nga sibilyan.
Sa engkwentro sang Huwebes, sila ang nakarecover man sang pila ka armas luthang, mga magazines, cellphone, personal nga dokumento kag mga subersibo nga mga dokumento nga may high intelligence value.
Bangod sa pagkapatay sang pila ka NPA members, liwat nga ginpanawagan ni Javines sa mga nabilin nga rebelde nga, magpanaog na sa kabukiran, buy-an na ang armas kag magsungka.
Pasalig sini nga wala sang kamatuoran ang pamahog nga sila ang patyon kag itorture sang mga suldado sa pagsungka kag ini ang mapamatud-an sang madamo na nga mga nagsurrender nga NPA.
Paandam sini nga sila ang indi maga-untat sa pagpatigayon sang focused military operation agud maseguro nga indi ma-impluwensyahan sang NPA ang Barangay and Sangguniang Kabataan Elections.
