Nakilala na ang isa sa duha ka mga lalaki nga nasapwan nga wala na sang kabuhi sa higad sang dalan sa Purok Talutog, Barangay Dulao, ciudad sang Bago kahapon sang aga.
Sa interview sang Bombo Radyo kay Police Staff Sgt. Armando Arao, imbestigador sang Bago City Police Station, ang isa ka lalaki ang ginkilala kay Edward Pille, 29 anyos, residente sang Bangga Yap, Barangay Alijis, Bacolod City kag may isa ka anak nga nagaedad sang tatlo ka tuig.
Suno sa iloy ni Pille, sa luyo sang iya nga lola nagdako ang biktima.
Nahibaluan sang iloy ang natabo kay Edward bangud nakit-an sang iya anak nga yara sa karon sa Metro Manila sa social media.
Suno sa iloy, nadakpan na sadto si Edward sa drug buybust operation sa ciudad sang Bacolod apang nahilway na, kag wala man sila nagkulang sa pagremind nga untatan na sini ang illegal nga ginahimo.
Suno kay Arao, ginahibalo pa ang motibo sa krimen kag isa na diri ang involvement ni Pille sa illegal drug trade.
Ginpahayag naman sang manghod ni Edward Pille nga nakilala niya ang iya nga magulang bangud suksok sini ang bayo kag shorts nga iya ginhulam sa iya nga manghod.
Suno kay Stefanie Pille, kaina lang niya nahibaluan ang natabo kay Edward apang nakita na sang iya magulang sa Metro Manila ang litrato sang krimen paagi sa social media.
Suno kay Stefanie, indi nila kaupod si Edward sa pagdako bangud lola nila ang nagpadako sa iya.
Suno diri, wala sang trabaho si Edward kag may yara ini sang bisyo nga pagpanigarilyo kag paggamit sang illegal nga druga.
May nagagwa naman nga ngalan para sa isa ka biktima apang indi pa ini madivulge sang Bago City Police Station samtang wala pa sang kumpirmasyon nagikan mismo sa iya nga pamilya.
Ginalantaw pa man ang footage sang mga CCTV camera nagikan sa Barangay Tabunan, Dulao kag Barangay Abuanan agud nga matsekyar kun may nakacapture sang ila nga paglabay.
Ginapatihan naman sang mga kapulisan nga indi lang isa ang suspetsado sa krimen.
Posible man suno kay Arao nga ginhal-id lang sa Dulao ang mga biktima bangud kun sa lugar sila gingapos, kuntani may sign of struggle ukon nahapay ang mga tanom.
Magacoordinate naman ang Bago City Police Station sa Bacolod City Police Office agud makatipon sang dugang nga impormasyon angot sa background sang mga biktima.
