Nakilal-an na ang isa pa gid sa duha ka mga lalaki nga nasapwan nga wala na sang kabuhi sa higad sang dalan sa Purok Talutog, Barangay Dulao, ciudad sang Bago, sang Sityembre 22.
Madumduman nga nasapwan ang duha ka bangkay sa higad sang dalan sa Purok Talutog, Barangay Dulao, ciudad sang Bago kun sa diin lunsay nga nahigtan sang masking tape ang mga kamot kag tiil sang mga ini samtang nakaputos man sini ang nawong kun sa diin mata na lamang ang makita.
Dugang pa nga wala sang gunshot wound ukon stab wound sa mga bangkay, kundi may ara lamang sang mga lagob sa lawas, apang parehas naman nga may hugot nga nakakuga nga level hose nga gamit sa construction ang ila mga liog.
Ang isa ka biktima ang ginkilala kay Edward Pille, 29 anyos, residente sang Bangga Yap, Barangay Alijis, Bacolod City kag may isa ka anak nga nagaedad sang tatlo ka tuig.
Nadakpan na sadto si Edward sa drug buybust operation sa ciudad sang Bacolod apang nahilway na.
Sa interview sang Bombo Radyo kay Plt Col Jay Malong, hepe sang Bago Coty Police Station, ang biktima ang ginkilala nga si Scot Arevalo, residente sang Purok Kabulakan, Brgy Singcang Airport, ciudad sang Bacolod.
Suno diri, isa ka Filiipino-American citizen si Arevalo kag ini positibo nga ginkilala sang iya utod nga nagpadulong sa estasyon sang kapulisan.
Nahibaluan nga may yara sang walo ka pending case si Arevalo may kaangtanan sa illegal nga druga, physical injury, illegal gambling kag alarm and scandal.
Suno kay Malong, madamo sang anggulo nga ginalantaw sa pagpatay sa duha ka biktima samtang nagapadayon ang ila imbestigasyon.
