Nagapatigayon na sang imbestigasyon ang Commission on Human Rights- Region 6 sa natabo nga engkwentro sa Purok Lubi, Barangay Tabugon, Kabankalan City sang Setyembre 21 sa tunga sang Philippine Army kag gina-alegar nga New Peoples Army kun sa diin anom ang napatay sa bahin sang armado nga grupo.
Sa interview sang Bombo Radyo kay Atty.Jonnie Dabuco, director sang CHR Region 6, motu proprio ang natabo nga imbestigasyon bangod dako ang insidente nga natabo.
Suno diri may yara sang alegasyon sa bahin sang pamilya sang nagkalamatay kasubong man nga may yara sang alegasyon sa bahin sang Philippine Army.
Pahayag ni Dabuco, dapat nga maimbestigsaran ang natabo nga engkwentro agud mahusayan kun ano ang kamattuoran kag mahatagan sang oportunidad ang naga-alegar kag gina-alegar nga makapresenta sang ila mga argumento kag ebidensya.
Apang, luyag gid sini nga makapadulong sa arrae kun sa diin natabo ang engkwentro agud makita ang lugar kag makakuha sang dugang nga ebidensya.
Kasubong man nga magakoordinar ini sa Philippine National Police para makakuha sang dugang mga impormasyon.Samtang, pahayag ni Dabuco, impotante man nga maimbestigaran kag mahibaluan ang matuod nga papel sang napatay nga si Ruben Gaitan ang driver sang tricycle nga ginsakyan sang NPA.
Suno diri, hibaluon dapat kun ini bala matuod nga miyembro sang NPA ukon sibilyan nga naulamid lamang.
Mensahe ni Dabuco sa mga pumuluyo kag miyembro sang armed forces of the Philippines nga kada isa may kaniya-kaniya nga prinsipyo kay kun mahimo nga siguraduhon nga indi maulamid ang mga sibilyan kag sa mga testigo naman, nagpanguyan ini nga bukas sila para magbaton sang koordinasyon agud mahatagan sang kasanagan ang ila imbestigasyon.
