Ginpakigbahin sang isa ka fish vendor nga indi maayo ang ila sitwasyon bangod nga wala sila nalakip sa master list nga makakuha sang pwesto sa ginakay-o nga fish section sa Bacolod Central Public Market.
Sa interview sang Bombo Radyo kay Rodel Soberano, humalin sa ginikanan sini tubtob sa iya nga ginabitbit pa lang sadto sang iloy kag amay sa merkado, ang pagbaligya sang isda amo ang ila nga palangabuhian nga bisan ulan, init kag bagyo, padayon sila sa ila negosyo.
Suno diri, ang iya ginikanan amo ang awardees kun tani para sa pwesto apang bangod nga napabay-an ang merkado, wala na sa master list ang ila mga pangalan.
Nakapasa man ini sang tanan nga ginapangayo nga requirements apang wala man ini gin-apubrahan.
Pahayag ni Soberano, wala naman ini sang iban pa nga makita nga palangabuhian, amo nga mapasaway na lang ini nga basta siya makapwesto kun sa diin siya makabaligya kag makaginansya.
Santo sa naeksperyensya sini, pila na ka mga alkalde ang nagpungko sa ciudad, saway kag kun kaisa ginalaot pa ini para lang pahalinon sa iya ginapwestohan, gani sa karun amo man sa gihapon ang iya sistema, amo nga magpakatig-a na lamang ini bangod bisan siya aminado man nga wala na ini sang may mahimo pa sa layi nga ginpatuman sang sa babaw.
Masakit para kay Soberano nga kiboton lang kag kuhaan siya sang palangabuhian gani nagahingyo ini nga mahatagan sang bisan gamay lang nga pwesto nga siya makabaligya kag makapiyan-piyan sang pang adlaw-adlaw nga kinahanglan.
