Isa ka libo ka sako sang kalamay nga nagabalor sang masobra P3 million ang nakuha sang ginaalegar lima ka mga lalaki nga nag-hijack sang duha ka wing van sa ciudad sang La Carlota diri sa probinsya sang Negros Occidental kagab-i.
Ang duha ka wing van nga ginapanag-iyahan sang HMP Trucking nga nabase sa Brgy. Malusgod, Pototan, Iloilo ang nagikan pa sa Iloilo bangud ginhire ini sang isa ka bakeshop chain kag nagpadulong sa Negros Occidental sang Sabado agud nga magkuha sang kalamay sa BISCOM Sugar Central sa banwa sang Binalbagan.
Kahapon sang udto, pabalik na sa Iloilo ang duha ka truck nga nagakarga sang tag-500 ka sako sang kalamay kag ginamaneho nanday Michael Orquin sang Cadiz City kag Jhujiet Arsenio sang Barangay Dapitan, Pototan, Iloilo.
Sa interview sang Bombo Radyo Bacolod kay Arsenio, nauna ang truck nga ginamaneho ni Orquin bangud siya ang mas nakasaulo sang dalan.
Pag-abot sa ciudad sang La Carlota ginabanta alas-8:00 kagab-i, nagpundo ang truck ni Orquin bangud may lima ka mga lalaki nga nagpapara sa iya kag naghingyo nga masakay kadungan sang pagpakilala nga sila ang driver man, gani nagpundo man si Arsenio.
Duha ka mga lalaki ang nagsakay sa truck ni Orquin samtang tatlo naman ang nagsakay sa ginamaneho ni Arsenio.
Wala pa naglayo ang nadalaganan nanday Arsenio sang ginpamangkot ini sang tatlo ka mga lalaki kun ano ang iya karga.
Sang nagsabat si Arsenio nga kalamay ang karga, diri na ini gintutukan sang short firearm kag ginpapili sa iya kabuhi ukon kalamay gani siya ang napilitan nga papunduhon ang truck.
Ginbaklid kag ginpiringan sang mga suspetsado si Arsenio kag ginbutang sa compartment sang truck kag isa sa ila ang nagmaneho sini palayo sa lugar.
Wala nakahibalo si Arsenio kun sa diin gindala ang iya nga truck ukon diin gindiskarga ang 500 ka sako nga kalamay bangud yara ini sa compartment.
Sang ulihi, ginsaylo si Arsenio sa likod sang truck kag didto naman si Orquin nga nakabaklid man kag nakapiring, apang ginbilin ang duha ka van sa higad sang dalan sa Hacienda Wawa, Barangay Pandanon Silos, banwa sang Murcia kaina sang aga.
Nagsinggitan si Arsenio gani sila ang narescue sang konsehal sa banwa sang Murcia ginabanta alas-9:00 sang aga.
Suno kay Police Major Marc Joel Reclamado, hepe sang Murcia Municipal Police Station, under investigation ang duha ka driver kag sila ang nagacoordinate sa HMP Trucking Company.
Nagbulig man sa ila ang La Carlota City Police Station, Provincial Investigation Unit sang Negros Occidental Police Provincial Office kag Highway Patrol Group.
Gilayon naman nga narecover ang sinako nga mga kalamay nagikan sa gin-alegar ginhijack nga wing van sa isa ka Barangay sa syudad sang Bago.
Sa interview sang Bombo Radyo Bacolod kay Police Lt. Col Jay Malong, bangod sa coordinated efforts sang Murcia Municipal Police Station kag Negros Occidental Police Provincial Office nahibaluan kun sa diin gindala ang mga kalamay.
Ini matapos ginsugid sang isa sa mga pahinante sang wing van ang nagpanugid sa mga kapulisan kun sa diin ang warehouse nga gindiskargahan sang produkto.
Suno kay Malong, ginpahayag man sang mga residente sa amo nga Barangay nga sila ang gintawag lamang sang pumuluyo man sa lugar agud magbulig diskarga, kag wala paman ang mga ini nabayaran.
Ginapahayag nga nagdangat man sa tatlo ka oras ang pagdiskarga sang produkto gikan sa duha ka wing van.
Sa karun may ara na sang persons of interest ang kapulisan, kun sa diin may iban nga padayun pa nga ginapangita.
Ang pumuluyo nga nagpanawag sang iban pa nga residente agud magbulig sa pagdiskarga ang gindala naman sa Bago City Police Station.
