Ginpanindugan sang wing van driver nga si Jhujiet Arsenio nga indi inside job ang natabo nga paghi-jack sa duha ka wing van nga nagakarga sang 1,000 ka sako sang kalamay nga nagabalor sang masobra P3 million sa ciudad sang La Carlota kagab-i kag sa banwa na sang Murcia narecover kaina sang aga.
Sa interview sang Bombo Radyo kay Arsenio nga residente sang Barangay Dapitan, Pototan, Iloilo, kag driver sang HMP Trucking nga nabase sa Brgy. Malusgod, Pototan, Iloilo, natrauma ini sa natabo bangud ini ang una nga kahigayunan nga siya ang nagpadulong sa Negros Occidental.
Suno diri, wala na ang iya nga cellphone kag tsinelas apang indi pa ini sigurado kun nakit-an sang mga suspetsado ang iya nga wallet nga nabutang sa ibabaw sang uluhan sang driver sa truck.
Ginabanta sini nga nagabalor sang P3 million ang bili sang kalamay apang suno sa iya, indi man nila masarangan ang paghimo sang kaangay nga krimen.
Suno kay Arsenio, gulpi lang ang natabo bangud nagasunod lang ini sa truck nga ginamaneho ni Michael Orquin gani wala ini sang ideya angot sa hijacking.
Nagpahibalo ini sa ila nga employer nga indi inside job ang natabo bangud wala ini sang natultulan sa Negros Occidental kundi nagasunod lang ini kay Orquin.
Suno diri, imposible nga inside job ang natabo bangud gingapos sila sa sulod sang wing van.
Suno kay Arsenio, nabatian sila sang mga tawo sa gwa nga amo ang nagrescue sa ila kaina sang aga bangud sila ang nagsinggitan.
